P5 milyong kahoy gisakmit sa task force
CEBU, Philippines - Nasakmit sa hiniusang pwersa sa Cebu Provincial Anti-Illegal Fishing Task Force (CPAFTF); Naval Intelligence And Security Unit Cebu; Task Force Kalasangan DENR-7 ug Regional Maritime Police-7 ang 39 ka board feet nga kahoy nga magcono kon Iron Wood gikan sa Surigao nga mobalor sa P5 milyones didto sa siyudad sa Mandaue sa miaging adlaw.
Gibutyag ni Joefrey Merencillos ang Team Coordinator sa CPAFTF nga nasakmit ang nahisgutang mga kahoy pinaagi sa search warrant nga giluwatan ni Judge Marilyn Lagura Yap sa Regional Trial Court Branch 28 sa dakbayan sa Mandaue.
Matud pa ni Merencillos nga ang mga kahoy nga magcono didto masakmit sa sulod sa balay ni Elder Cabahug sa barangay Looc , sa syudad sa Mandaue samtang ang ubang mga kahoy didto na nila makuha sa ilawom sa dagat kay gipanghagbong kini sa suspetsado.
Sa pagkakaron gihikay na sa mga otoridad ang kasong pagpayuhot og mga kahoy nga walay tukmang mga papeles batok kang Cabahug.
Samtang gipahibawo ni Merencillos, nga ang maong team nakasakmit usab og mga kahoy nga gituohang pinayuhot gihapon didto sa may barangay Sta. Rosa, sa Isla sa Lapulapu niadtong miaging semana.
Matud pa ni Merencillos nga gawas sa mga kahoy, nasakmit usab nila ang pump boat nga gikargahan sa 760 ka board feet nga Mahogany, Gmilina ug mga Coco lumber tungod kay wala usab kini saktong dokumento.
Ang kinatibuk-ang mga kahoy nga nasakmit gibanabanang mobalor og P50 mil.(WC) (BANAT NEWS)
- Latest
- Trending
