CEBU, Philippines - Gikasubo ni Vice Governor Agnes Magpale ang panagbangi sa mga dagkong opisyal sa Dakbayan sa Danao.
Kini ang gipadayag ni Magpale ngadto sa mga sakop sa media bahin sa iyang reaction sa panagbingkil tali nila ni Danao City Mayor Ramon Boy Durano Jr. ug sa igsoon niining si Danao City Vice Mayor Ramon Nito Durano.
Matud pa sa bise gobernador nga nabalaka siya sa nagkagrabeng panagdumot karon sa managsoong Durano sa ilang dakbayan.
Apan iyang gitataw nga wala siyay mahimo sanglit may awtonomiya man ang mga opisyales sa dakbayan sa Danao gikan sa kagamhanan sa lalawigan sa Sugbo.
Wala usab motug-an ang bise gobernador kun may usa ba kanila ni Ramonito ug Boy Durano ang nagpakitabang sa iyang buhatan.
Si Magpale miingon nga iya na lamang gilingaw ang iyang kaugalingon sa uban niyang mga gimbuhaton sa Kapitolyo aron dili siya maapektohan sa politikanhong panagsungi sa mayor ug bise mayor sa Danao nga pulos iyang kadugo.
Base sa mga nanggawas nga report nga si Mayor Boy Durano pormal nang nakaduso sa COMELEC og recall petition batok kang Bise Mayor Ramonito Durano ug mga miyembro sa konseho, samtang ang bise mayor naglaraw usab nga mopa-recall sa mayor. (BANAT NEWS)