CEBU, Philippines - Mga kahimanan alang sa pagtubag sa mahitabong katalagman gitugyan sa dakbayan sa Mandaue ngadto sa kabarangayan niadtong Miyerkules.
Ang dakbayan mitunol sa 14-footer fiber glass boat, 9-footer fiber glass boat, life jackets, generators, chain saws, pala, flashlights, botas, rain coats ug uban pa nga gamiton sa pagpangandam sa kalamidad.
Ang maong kahimanan nga gigahinan sa kantidad og P3 milyones gikan sa calamity fund sa tuig 2011 sa gipatuman usab nga calamity preparedness program sa kagamhanan sa maong dakbayan nga gipalihok ubos sa City Disaster Risk Reduction Management Council (CDRRMC).
Si Mayor Jonas Cortes nga maoy chairman sa CDRRMC maoy nangulo sa pagtugyan sa maong mga kahimanan nga giubanan usab sa pagtambong nila ni Bise Mayor Glenn Bercede, konsehal Emmarie Lollipop Ouano Dizon ug uban pa nga mga sakop sa konseho.
Ang Association Barangay Council (ABC) Federation president nga si Subangdaku barangay kapitan Ernie Manatad mao usab ang nangulo sa mga barangay opisyal sa dakbayan sa pagtambong sa ceremonial turnover nga gipahigayon sa city hall niadtong adlaw’ng Miyerkules.
Si Cortes mipasabot nga ang maong ekipo gikinahanglan sa panahon sa mahitabong katalagman nga sama baha, pagdahili sa yuta, sunog ug uban pa.
Si Mario Perez nga maoy pangulo sa Accident Control and Emergency Response Team (ACERT) miingon nga magpaabot pa ang ilang buhatan sa listahan sa mga molupyo sa barangay nga boluntaryo nga mahimong sakop sa barangay rescue team nga ipaubos nila sa training seminar
Gipasabot niya nga gikinahanglan kaayo ang training seminar sa mga moboluntaryo nga magpasakop sa rescue team sa matag cluster alang sa paghatag kanila sa mga pamaagi sa pagluwas sa kinabuhi sa mga tawo sa panahon sa katalagman. (EIM) - (BANAT NEWS)