Supervisor patay sa aksidente

CEBU, Philippines  - Patay ang supervisor sa usa ka department store ug kritikal usab ang kahimtang sa babayeng angkas niini dihang aksidenteng nidasmag sa nag-parking nga trak de karga ang ilang gisakyan samtang paingon nang mopauli gikan sa disko sa highway sa sitio Tambisan barangay Mantalongon lungsod sa Barili niadtong Miyerkules sa alas 2:00 sa kaadlawon.

Ang drayber sa motor nga patay nang nadangat sa tambalanan mao si Esteban Barolo, 25, taga Bonbon, Aloguinsan ug supervisor sa usa ka dakong tindahan sa Carcar. Samtang talandugon ang kahimtang sa angkas niining si Rowena Catalan, 25, taga barangay Balud lungsod sa Dalaguete.

Matud ni SPO2 Zaldy Orillo sa Barili Police dihang nahinabi sa Banat News kusog ang dagan sa motorsiklo sa duha ug parehong wala magsuot og helmet.

Pag-abot sa maong lugar wala makabantay si Barolo sa nag-parking nga Mitsubishi Isuzu Fighter Cargo van ug maayong pagkasampak sa duha sa luyong bahin sa maong sakyanan.

Ang mga biktima nga pulos wala nay panimuot nga gihatud sa Barili District Hospital apan patay na si Barolo samtang gibalhin og tambalanan dinhi sa dakbayan sa Sugbo si Catalan. (BANAT NEWS)