Internet scam gibutyag sa BOC-Cebu

CEBU, Philippines - Giduso sa Bureau of Customs ngadto sa National Bureau of Investigation- 7 ang pag-imbestigar sa scam pinaagi sa internet nga maoy pamaagi sa pag-ilad sa mga tawong kunohay adunay gipadalang parcels o packages nga gipaagi sa Customs Sub-Port of Mactan.

Si Cebu Deputy Collector for Operations Francis Agustin Ahmed Erpe nagkanayon nga ang modus operandi sa mga mangingilad mao ang pakighigala og taga dinhi sa Pilipinas.

Pinaagi sa chat magkasuod sila hangtud nga ang mangingilad mopasiatab nga aduna kini parcel o package nga ipadala ngadto sa biktima apan mangayo kini og kwarta nga mao kunoy ipangbayad sa customs taxes sa maong kargamento.

Aron madani ang biktima mopasalig ang mangingilad nga adunay mahalong butang o ba kaha gipasupot nga kwarta sa sulod niini maong mopadala sila og kwarta. Si Customs Sub-Port of Mactan Collector Atty. Paul Alcazaren mibutyag sa Banat News  nga niadto pang bulan sa Pebrero ning tuiga mahitabo ang maong scam ug iyaha na kining gipahibalo kang Cebu Customs District Collector Atty. Ronnie Silvestre ug ni Coll. Erpe.

Matud pa ni Alcazaren sukad niadtong bulan sa Pebrero unom na ka mga reklamante gikan sa mga lagyong dapit ang personal nga midangop sa iyang buhatan ug nagpakisayod kung hain na ang ilang mga kargamento.

Apan sa ilang pakisusi walay susamang package nga gipadala, dihang ilang gisukit-sukit ang mga reklamante diha nila masayring pareho ang sirkumstansya sa pagkaila-ila nila sa tawong nagpadala kanila og package. Gawas sa mga personal nga mianha sa ilang buhatan aduna pay laing mga nanawag ug nagpangutana sa ilang packages nga nasutang dili usab tinuod.

Kasagaran sa mga biktima mitumbok sa usa ka cargo forwarder nga bogus o hinimo-himo ra nga dunay address sa sitio Matumbo, barangay Pusok dakbayan sa Lapulapu ang giingong gipadala sa package.

Pipila sa mga biktima nakapadala og 400 ngadto 600 dolyares sa unang pangayo sa mangingilad ug duna pay higayon nga may nakahatag og 1,500 dolyares tungod kay giingong gipugngan sa customs sa Mactan ang kargamento. (/EIM) (BANAT NEWS)