Divorce bill makaguba sa pamilya - Binghay

CEBU, Philippines - Subling gibarugan sa Archdiocese sa Sugbu ang hugot nga pagsupak sa plano sa pipila ka mga magbabalaod nga himuong legal ang diborsiyo dinhi sa nasud.

Nasayran nga ang maong balaudnon unang gipasa ni Gabriela Partylist representative Lisa Maza niadtong tuig 2005 ug padayong init nga gidebatihan ang planong paghimong legal sa divorce dinhi sa nasud.

Ang Pilipinas mao nalang ang nahibilin sa duha ka nasud sa kalibotan nga wala pay balaod sa diborsyo uban sa Vatican City ang pinuy-anan sa Santo Papa. Ang Catholic Bishops’ Conference of the Philippines (CBCP) unang mipadayag sa ilang pagsupak sa Divorce Bill sa kahadlok nga mahimo kining rason sa pagkaguba sa batasan sa mga Filipino nga grabeng mihatag og bili sa pamilya.

Susama niini ang baruganan sa Archdiocese sa Sugbu nga nagtuo nga makadaot ug makaguba sa moralidad sa matag pamilya ang maong balaudnon kun mapasa.

 “Di gyud makaayo ang divorce, baliwalaon niini ang kasagrado sa sakramento sa kaminyuon busa supak ang simbahan niini,” matud pa ni Msgr. Esteban Binghay, Episcopal Vicar sa Archdiocese of Cebu. Wala usab nakita sa simbahan nga matubag sa diborsyo nga mahunong ang pagpangabuso ilabi na sa mga asawa tungod kay aduna nay mga napasa nga balaod nga makatabang sa mga babaye nga makalingkawas sa ilang mga bana ug usa na niini ang annulment.

“Daghan pag paagi, dili lang ang divorce tungod kay sayun-sayunon nalang unya sa mga manag-asawa ang pagpakasal unya pagbuwag kung mapul-an na sa usa’g-usa,” dugang pa ni Binghay. (EIM) (BANAT NEWS)