Usa patay, kauban kritikal human motor nalamba

CEBU, Philippines - Patay ang angkas ug kritikal ang kahimtang sa drayber sa motorsiklo dihang nalamba ang ilang motor didto sa sitio Solong-on barangay Poblacion atol sa kapistahan sa lungsod sa Badian niadtong Lunes sa alas 6:30 sa gabii.

Ang patay nang nadangat sa tambalanan mao ang angkas nga si Vicriano Pardillo Sottomayor, hingkod ang panuigon, molupyo sa lungsod sa Ginatilan, samtang ang drayber sa motorsiklo nga Honda XRM kolor puwa mao si Melquides Puson, 52, anyos, minyo, taga Poblacion, Badian.

Si PO1 Mauro Gramatica, desk officer sa Badian Police Station nga nahinabi sa Banat News mibutyag nga gikan sa buwangan sa barangay Banhigan.

Ang drayber sa motor nga si Puson nakahukom nang mopauli ug si Sottomayor mihangyo nga moangkas kay mopauli na usab kini. Ang duha pulos wala magsul-ob og helmet.

Pag-abot sa lugar nga nahitaboan aksidenteng nadakin-as ang motorsiklo ug nalamba.

Si Sottomayor unang natagak ug maayong pagka pantok sa ulo niini sa semento nga karsada ug sunod nga nalamba ang drayber.

Ang duha daling gitabang sa mga estambay diha sa maong lugar ug gihatud dayon sa Badian District Hospital apan wala na makaabot nga buhi sa maong tambalanan si Sottomayor samtang si Puson gibalhin dayon sa pribadong tambalanan sa dakbayan sa Sugbo ug gihulagway nga anaa usab sa talandugon nga kahimtang.

Gituohan sa kapolisan nga pulos nakainom ang drayber ug angkas nga gikan sa tari sa wala pa ang hitabo nga maoy hinungdan sa disgrasya. (BANAT NEWS)