Gwendolyn ug CCCI motukod og hotel

CEBU, Philippines - Si Governor Gwendolyn Garcia ug mga opisyales sa Cebu Chamber of Commerce and Industry (CCCI) nagkasabot nga magtukod og One Stop Shop Hotel nga maoy bagsakanan sa mga nagkalainlaing produkto dinhi sa dakbayan sa Sugbo.

Kining maong kasabotan nakab-ot sa tigum nga gihimo tali sa gobernador ug sa mga opisyal sa CCCI nga gipangulohan sa presidente niini nga si Consul Samuel Chioson sa miaging Martes .

Si Chioson nga nahinabi sa mga tigbalita miingon nga kining ilang gikasabotan ila gayung paningkamotan nga matuman aron magtampunsisok ang mga lokal ug langyaw nga mga turista sa pagpamalit sa tanan nilang panginahanglanon gikan sa mga pagkaon ug uban pang produkto sa nagkalainlaing industriya nga gikinahanglan sa tanan sa inadlaw-adlaw nga panginabuhi.

Nalantawan nila nga ang tanang turista makauyon sa pagpahuway sa maong hotel sanglit anaa ra usab ang tanang mga produkto sa Sugbo nga magustohan nilang paliton.

Sa maong kasabotan, ang kagamhanan sa lalawigan maoy mohatag og luna nga katarokan sa edipisyo samtang ang CCCI mao usab ang moabaga sa paggasto sa tukorong One Stop Shop Hotel. Sa pagkakaron gipilian pa ang lote   nga nahimutang sa sitio Sudlon, sa barangay Lahug sa dakbayan sa Sugbo ug ang nahimutang sa luyo nga bahin sa Cebu International Convention Center (CICC) sa siyudad sa Mandaue.

Hinuon gitumbok ni Chioson nga magtagbo pa sila og balik ni Gobernador Garcia uban sa mga opisyales sa CCCI karong Agosto 10 alang sa paghan-ay sa konkretong lakang alang sa pagpatuman sa maong proyekto. (BANAT NEWS)