Mag-uuma misaway sa SONA ni P.Noy

CEBU, Philippines - Nadismaya ang sektor sa panguma   kang Presidente Benigno Simeon “Noynoy” C. Aquino III gumikan kay wala hisgoti sa iyang State of the Nation Address (SONA) niadtong Lunes   ang mga maayong programa niini sa agrikultura labi na ang bahin sa land reform alang sa mga mag-uuma. Ang Executive Director sa Farmers Development Center (Fardec) nga si Estrella Catarata kagahapon nagkanayon nga naminghoy human makapaminaw sa hapit usa ka taknang SONA sa Pamuno nasud.

Si Catarata mitug-an sa Banat News nga mokabat sa 69% sa 85 milyones nga populasyon sa Pilipinas ang nahimutang sa agricultural sector busa iyang giawhag ang kagamhanan nga unta hatagan kini og pagtagad.

Matud pa niya nga daghang mag-uuma ang walay kaugalingong yuta ug misilbi lang sa mga adunahang tawo sa menos kaayo nga suweldo.

Midugang si Catarata nga angay untang mopatuman ang Pamuno nasud og Genuine Land Form aron makabaton og higayon ang mga mag-uuma nga makapanag-iya og yuta ug dili na sila maglisod sa ilang panginabuhian.

Nabalaka si Catarata sa sitwasyon karon nga daghang mga mag-uuma ang mawad-an og panginabuhi tungod kay kasagaran sa mga kaumahan gihimo nang kabalayan. (BANAT NEWS)