Kamot limpyohan una mokaon- CESSU

CEBU, Philippines - Gipahimangnoan sa hepe sa City Epidemiology Surveillance and Statistics Unit (CESSU) Durenda Macasucol ang publiko nga manghugas kanunay sa kamot una mokaon ug siguroong limpiyo ang tubig nga imnon aron malikayan ang diarrhea.

Base sa talaan sa Cebu City Health Department mikabat na sa 2, 282 ang mga kaso sa diarrhea dinhi sa dakbayan ug tulo na ang namatay, gikan sa Enero hangtud sa tungang bahin sa Hulyo ning tuiga.

Hinuon menos ang maong gidaghanon kun itandi sa 2,881 sa susamang period sa miaging tuig   diin pito ang namatay.

Sumala pa ni Macasucol nga mimenos karon ang kaso sa diarrhea gumikan sa hugot nilang kampanya sama sa gihimo nilang “house to house” campaign   sa pag-monitor sa mga kabalayan sa ilang hurisdiksyon.

Gawas sa diarrhea nakaalerto usab karon ang siyudad sa pag-monitor sa ubang sakit, sama sa dengue ilabi na niining kanunay nga pagbunok sa uwan.

Nasayran nga mikabat na sa 692 ka kaso sa dengue ang nalista gikan sa Enero hangtud niadtong Huyo 16 karong tuiga ug walo na ang namatay .

Samtang sa susamang period sa miaging tuig, mikabat sa 722 ang nasugamak sa maong sakit ug pito ang namatay.

Sumala pa ni Macasucol nga ang pagpanghinlo sa palibot maoy labing epektibo nga pamaagi sa paglikay sa dengue ug ubang sakit.

Dugang pa niya nga kinahanglang modangop dayon sa labing duol nga health center ang matag tawo nga may bation nang   sakit sa lawas sama sa   walay hunong nga hilanat aron masuta dayon kung may dengue ba o wala. (BANAT NEWS)