Opisina sa waterworks gikawata'g P8mil

CEBU, Philippines - Mikabat sa P8 mil ang nasakiyo sa kawatang wala hiilhi nga milungkab sa buhatan sa waterworks system   sa barangay Pugalo sa lungsod sa Alcoy sa miaging kaadlawon.

Ang tanod nga si Dario Carunggay, hingkod, maoy nakadiskobri sa maong hitabo niana nang pagka alas 6:00 sa buntag niadtong Domingo.

Si PO2 Godofredo Amancio sa Alcoy Police Station mibutyag sa Banat News   nga samtang milibot si Carunggay sa opisina sa Pasol Pugalo Waterworks Association nga nahimutang sa maong lugar nadiskobrehan niini nga naabli na ang pultahan sa maong buhatan. Dali niya kining gi-report sa manager sa maong   opisina ug dayon gisumbong ngadto sa kapolisan.

Atol sa gihimong pakisusi nasuta nga nahurot gyud og pupho sa kawatan ang P8 mil nga koleksyong bayad sa tubig nga gisulod sa hunos sa usa ka lamesa.

Hinuon padayon pang gisuta sa kapolisan ang maong hitabo aron matumbok kun pila ka tawo ang milungkab  sa maong buhatan ug misakiyo sa maong kantidad.  - BANAT NEWS