Taga KUSUG mitambong sa birthday ni Tomas

CEBU, Philippines - Gibutyag ni Kapitan Rodrigo Jabellana sa barangay Bulacao ning dakbayan sa Sugbo nga wala niya huna-hunaa ang politika sa pagtambong niya sa birthday party ni Kongresista Tomas Osmeña niadtong Domingo sa gabii sa usa ka hotel dinhi sa siyudad.

Si Jabellana nailhan kaniadto nga usa ka lunod-patay nga suporter sa Kugi Uswag Sugbo (KUSUG) nga karibal sa grupo sa kongresista nga mao ang Bando Osmeña Pundok Kauswagan (BOPK).

Ang laing sakop sa oposisyon kauban ni Jabellana sa maong okasyon mao si Kapitan Eugenio Gabuya sa barangay Cogon kinsa mipadayag usab nga dili angay hatagan og kolor politika ang pagtambong niya sa maong kalihokan.

Mipadayag si Jabellana nga layo pa kaayo ang eleksyon busa dili kini angay hisgotan ang maong isyu karong panahona.

“Nakatrabaho naman ko sa City hall kaniadto, maong mga amigo ra gyud na nako ang mga nangaging nanglingkod nga mga opisyal sa atong siyudad,” sumala pa ni Jabellana.

Dugang pa niya naa ra sa trabaho ang iyang konsentrasyon karong panahona.

“Mo-focus lang gyud ta sa atong trabaho, kabalo naman ta nga non-partisan gyud nang mga opisyales sa barangay,” dugang pa ni Jabellana. (BANAT NEWS)