CEBU, Philippines - Usa ka kapitan sa barangay gireklamo nga nanghagis ug gipanglarot ang koral sa iyang silingan didto sa barangay Linao sa maong dakbayan kagahapon.
Si Kapitan Fe Ylanan sa Linao, asawa ni konsehal Val Ylanan sa dakbayan sa Talisay maoy unod sa blotter sa kapolisan nga gipasuwat sa mireklamo nga si Florencia Balingit, 79, kinsa maoy miangkong tag-iya sa koral nga gilarot sa suspetsadong kapitan.
Si Alexander Gabi, 35, ug kawani sa buhatan ni konsehal Dennis Basillote sa dakbayan sa Talisay kinsa maoy mipa-blotter sa hitabo, maoy mibutyag nga ang luna kansang koral gilarot sa suspetsado, gitakda nga tarokan sa balay ni Merta Odiso.
Si Odiso kansang balay nagbabag sa barangay road sa maong dapit miuyon nga mabalhin sa luna nga gitikad ni Balingit human mohangyo ang kapitan ug ang mga molupyo sa maong lugar.
Si Gabi, kinsa umagad ni Balingit mibutyag sa Banat News nga dugay nang gireklamo sa iyang ugangan ngadto sa Department of Agrarian Reform (DAR) kay dili kini mosugot nga ang iyang lote tukoran sa balay ni Odiso. Niadtong Marso 9, 2011 adlaw’ng Miyerkules sa buntag maoy adlaw nga gitakda sa DAR alang sa atubang nila ni Balingit ug Ylanan aron unta matuki ang nahisgutang problema.
Apan matud ni Gabi nga wala motungha si Ylanan didto sa buhatan sa DAR niadtong higayona. Si Gabi mibahad nga mopasaka sila og tukmang kaso batok sa kapitan tungod sa gibuhat niini.
Si Ylanan sa iyang bahin miangkon nga giguba niya ang koral nga kawayan nga gitaod ni Gabi kagahapon sa buntag sa lugar nga tarokan unta sa balay ni Odiso. (BANAT NEWS)