Polis mi-checkpoint og 15 oras sa SONA

CEBU, Philippines - Gibantayan sa kapolisan sa dakbayan sa Talisay ang tibuok siyudad sulod sa 15 oras atol sa gipahigayong State of the Nation Address (SONA) ni Presidente Benigno Aquino III niadtong Lunes. Si Chief Inspector Eddie Recamara, officer-in-charge sa Talisay City Police Station (TCPS) mibutyag nga malinawon kaayo ang tibuok dakbayan sa maong adlaw, sanglit nagpahigayon sila og mga checkpoint sa nagkalainlang dapit sa dakbayan gikan pa sa alas 4:00 sa kaadlawon hangtod sa gabii sa maong adlaw.

Gibutyag ni Recamara nga ang ilang gibuhat maoy pagtuman sa   direktiba ni Sr. Supt. Patrocinio Comendador, hepe sa Cebu Provincial Police Office (CPPO) alang sa tanang mga police headquarter sa kalungsoran ug dakbayan sa higpit nga pagkamabinantayon alang sa pagmentenar sa kahapsay ug kalinaw sa maong adlaw. Hinuon matud ni Recamara nga misaler ang ilang pagbantay kay wala gyuy kasamok nga mitumaw atol sa SONA ug   bisan ang rally sa mga cause oriented group nga giduyogan sa mga vendor sa merkado publiko sa Tabunok wala makamugna og kasamok sa maong higayon. (BANAT NEWS)