Anak sa mayor midaro'g 9 ka sakyanan

CEBU, Philippines - Siyam ka mga sakyanan ang gidaro sa usa ka sakyanang gimaneho sa anak sa mayor sa lungsod sa Ronda kinsa giingong hubog didto sa M.J. Cuenco Avenue, barangay Carreta, dakbayan sa Sugbo kagahapon sa alas 2:45 sa kaadlawon.

Ang suspetsadong drayber mao si Mark Gregory Magtuba Blanco, 23-nga taga barangay Poblacion, lungsod sa Ronda ug anak sa mayor sa maong lungsod.

Si SPO3 Ramon Budiongan kinsa maoy miimbistigar sa insidente mibutyag sa Banat News nga si Blanco nagpaingon sa SM City mall dihang kalit lang niining gidaro ang mga sakyanan nga nagparada sa daplin sa karsada.

Ang mga gidarong sakyanan mao ang duha ka PUJ, tulo ka multicab, usa ka pick-up, Seddan, ug usa ka Tamaraw.

Matud ni Budiongan nga wala mohunong si Blanco human daroha ang maong mga sakyanan ug mipadayon siya sa pagpadagan paingon ngadto sa General Maxilom Avenue ug pag-abot sa eskina sa A. Soriano paingon sa SM midaro na usab og laing sakyanan nga gimaneho ni Vicente Sumalinog Arnado, 42, taga barangay Jubay, lungsod sa Lilo-an.

Apan wala gihapon mohunong si Blanco hangtud nga mibangga kini sa poste sa traffic light sa A. Soriano Street diin didto na siya hingpit nga mipahuway kay nasamad man ang iyang dagway ug nangabali ang iyang ubang bahin sa lawas. Gidala kini ngadto sa Cebu City Medical Center (CCMC) diin didto masuta nga lasbag kaayo ang suspetsado samtang nagmaneho sa iyang sakyanan. (BANAT NEWS)