Gibinaklid gi-salvage

CEBU, Philippines - Usa ka wala pa mailhing patay’ng lawas sa usa ka lalaki nga gituohang biktima sa salvage ang napalgan sa daplin sa dalan sa sitio Roosevelt sa barangay Busay ning dakbayan kagahapon alas-2 sa kaadlawon.

Ang biktima adunay daghang samad pinusilan sa nawong nga gibinaklid ang mga kamot og gapos sa electrical wire ug gibaatan og packaging tape ang nawong.

Si PO3 Wetzel Berry sa Homicide Section sa Cebu City Police Office (CCPO) nga nahinabi sa Banat News miingon nga ang biktima gibana-banang nagpangidaron dul-an sa 30-anyos, brown complexion, 5’2” ang gitas-on, nag-shorts og brown ug puti nga t-shirt, dunay dakong tattoo sa iyang bukobuko nga ‘Luna Xuper Salbahis,’ ug Ric-ric Avila diha sa iyang tiil.

Gituohan sa kapulisan nga gi-salvage ang biktima, gipatay daan una pa gilabay sa maong lugar.

Usa ka gwardya sa Mountain View Park diha sa nahisgutang lugar maoy nanawag sa kapulisan human niini nakit-an ang biktima.

Matud sa gwardya nga si Nelson Alberca nga samtang siya naglakaw sa maong lugar iyang nakit-an ang usa ka multicab nga dunay gilabay sa daplin ug pagkahuman daling mibiya sa maong lugar.

Wala makuha sa gwardya ang kolor sa multicab ingon man ang plate number niini.

Sa dihang gisusi ang crime scene sa sakop sa Crime Scene Investigation Unit (CSIU) upat ka basiyo sa gituohang calibre 45 ug usa ka fragment ang nakuha diha sa maong dapit.

Walay nadungog nga buto-buto sa armas nga nadunggan sa mga residente sa maong dapit ug gituohan nga giapil nalang sa paglabay ang mga basiyo sa bala tupad sa lawas niini. EIM (BANAT NEWS)