Ugangan gisanggot sa umagad

CEBU, Philippines - Napahak ang ulo sa usa ka ugangan human kini tigbasa sa iyang umagad   nga bana sa iyang anak didto sa New Poblacion Public Market sa Poblacion lungsod sa Daanbantayan niadtong Domingo sa alas 3:00 sa hapon.

Ang biktima mao si Sergio Villegas, 60, minyo, nga nagpuyo sa maong lugar, samtang ang suspek mao usab si Gillermo Cadiz, 40, nga iyang umagad.

Si PO2 Henry Compuesto sa Daanbantayan Police Station mibutyag sa Banat News nga ang biktima ug ang suspek pulos lasbag niadtong higayona.

Gumikan sa kahubog, ang biktima miadto sa balay sa suspek ug gihagit niini og away ang naulahi.

Ang suspek usab nga dali kaayong miinit ang ulo gumikan sa bino nga nainom niini, migawas sa balay nga nagdala og sanggot ug gitigbas dayon ang biktima. Ang biktima nga kuwang sa praktis, wala makasagang busa napaksit ang walang bahin sa ulo niini dapit sa kilid sa iyang agtang.

Gumikan sa tambag sa mga silingan, wala makapadayon og panigbas ang suspek ngadto sa biktima ug mitahan hinuon kining malinawon ngadto sa kapolisan samtang ang biktima daling gihatod ngadto sa Daanbantayan District Hospital.

Nasayran sa kapolisan nga dugay nang nagkabingkil ang ugangan ug ang umagad ug napukaw dihang nagkatagbo sila nga pulos hubog sa maong higayon.    - (BANAT NEWS)