SONA ni P.Noy way kalainan sa uban
CEBU, Philippines - Gisugat og lihok protesta dinhi sa Sugbu nga gitawag og Peoples SONA sa mga militanteng pundok sa Sugbo ang ikaduhang State of the Nation Address (SONA) ni Presidente Benigno “Noynoy” Aquino III kagahapong adlawa didto sa Kongreso.
Ang grupo sa mga militanteng pundok nagtapok sa Fuente Osmeña Rotunda ug nagmartsa paingon sa dalan Colon ug mipahigayon og mubong programa nga nagpalanog sa ilang wala pagkatagbaw sa administrasyon ni Aquino.
Misalmot sa maong protesta mao ang Bayan Muna Central Visayas, Anakpawis, Gabriela, Kilusang Mayo Uno KMU, Kilusang Magbubukid ng Pilipinas KMP, Panaghugpong Kadamay ug uban pa.
Ang chairman sa Bayan Muna Central Visayas Jaime Paglinawan mipadayag dihang nahinabi sa Banat News nga way mga kausaban ubos sa bag-ong administrasyon.
Matud ni Paglinawan nga namahid ra sa kapalpakan ang administrasiyong Aquino sa milabay’ng pamunoan.
Alang kang Paglinawan mas nisamot pa karun ang mga nasinati ug giatubang nga problema sa nasud ilabina ang sunod sunod nga pag-umento sa mga produktong petrolyo ug pagmahal sa mga nag-unang palaliton.
Matud ni Paglinawan nga ubos ning usa ka tuig nga pamunoan ni P.Noy niabot og 28 ka higayun nga misaka ang presyo sa lana ingon man ang pagsaka usab sa kuryente.
Dugang niya nga basi sa survey niabot usab og 11.3 ka milyon ka mga tawo ang pabiling walay trabaho, 4.3 ka milyon ka pamilya usab ang padayung gigutom og 10.4 ka milyon ka pamilya ang nag-antos sa tumang kakabus.
Gisaway usab nila ang gipatumang policy solution ni Aquino sama sa pantawid pamilya program ug ang pantawid pasada cards nga fuel subsidy sa mga drayber nga gihulagway nilang usa lang ka pag-ulog-ulog ug way epekto. - (BANAT NEWS)
- Latest
- Trending
