Pilderong senador mihagit ni Sen. Zubiri pag-resign
CEBU, Philippines - Nanawagan si Atty. Aquilino ‘Koko’ Pimentel III ngadto kang Senador Miguel Zubiri nga mo-resign sa pagka-senador ug tinud-on niini ang giluwatang pamahayag upat na ka tuig ang nakalabay nga andam siyang moluwat sa katungdanan kun ugaling dunay nahitabong tikas didto sa Maguindanao niadtong nakalabay’ng eleksyon sa 2007.
Si Pimentel mianhi dinhi sa Sugbu kagahapon sa buntag ug mipatawag og press conference aron awhagon si Presidente Benigno Aquino III nga klarohon ang polisiya ug mga plano sa electoral reforms atol sa ikaduhang State of the Nation Address (SONA) kagahapon sa hapon.
Matud ni Pimentel nga wala na siya makurat sa gikumpisal sa suspendidong si Maguindanao Gob. Zaldy Ampatuan kabahin sa nahitabong tikas sa milabay’ng eleksyon niadtong 2007.
Sumala pa niya nga nasayod na siyang daan nga duna gyuy tikas sa maong probinsya tungod kay usa siya sa nabiktima niadto ug misang-at siya og election protest batok kang Zubiri.
Si Zubiri milabaw og 110 mil botos sa kinatibuk-an walay labot sa resulta sa Maguindanao diin midaog si Zubiri og 128 mil botos hinungdan nga napildi siya sa naulahi. Matud ni Pimentel nga 98 porsiyento ngadto sa 100 porsiyento nga na-eksamin nga resulta didto sa Maguindanao pulos peke tungod sa grabeng maniobra sa resulta sa eleksyon niadtong 2007.
Tungod sa maong resulta, daghan ang nasirohan nga mga kandidato sa pagka senador niadtong higayona ug usa na niini si senador ug karun presidente Benigno Aquino III.
“Marami ang gusto na marinig ni P.Noy (Aquino) sa kanyang SONA, what is agenda of electoral reforms, electoral justice, sana i-mentain niya (Aquino) sa SONA ang clear policy and plans of electoral reforms,” matud pang Pimentel.
“Migz Zubiri said kung mayrong electoral fraud, he will resign if there is proof na mayrong dayaan, dapat consistent siya (Zubiri) what has been saying na nandyan na mayrong manipulated sa Maguindanao,” hagit pa niini. - (BANAT NEWS)
- Latest
- Trending
