Sugbo mosuporta sa gobernador

CEBU, Philippines - Pormal nang gipirmahan ni Gobernador Gwendolyn Garcia ug Alvin Loa, Presidente sa Superior Gas & Equipment Company (SUGECO) ang Memorandum of Agreement (MOA) kalabot sa suporta sa naulahi sa kampanya nga Anti-Grafitti Vandalism Campaign sa gobernador. Ang pagpinirmahay nila gihimo atol sa general assembly sa mga mayor, vice mayor, ug mga kapitan sa barangay sa tibuok lalawigan sa Sugbo didto sa Cebu International Convention Center ( CICC) sa siyudad sa Mandaue niadtong Miyerkules.

Gitin-aw sa maong kasabotan nga ang lalawigan sa Sugbo lamang ang tagaan sa SUGECO company sa ilang mga biya nga calcium carbide kun Calburo nga maoy gamiton sa lalawigan pagpamintal sa mga lugar nga adunay daghang vandal kun suwat-suwat.

Si gobernador Garcia sa iyang bahin nagkanayon nga sa maong MOA makabenepisyo ang lalawigan kay dili na kini makagasto sa pagpamalit og pintal para ipapas sa mga hugaw nga mga suwat-suwat sa mga pader, poste ug uban pa sa daplin sa kadalanan.

Samtang ang hepe sa Capitol Consultant on Projects and Programs Institutionalization Ma.Ezperanza Cristina Garcia Frasco nagkanayon nga dako kaayo kini og ikatabang sa programa nga E. Gwen Highway sa gobernador.

Pinaagi niini malimpyo na ang mga highway, dili lang ang karsada kundi bisan ang kadaplinan niini gikan sa mga panghugawhugaw sa mapahimuslanong mga batan-on.  - BANAT NEWS