Laing nagbuhi og menor alang sa sex gipanid-an

CEBU, Philippines - Human sa pagkasikop sa usa ka Australian national sa dakbayan sa Naga sa milabay’ng adlaw ang kapolisan sa siyudad aduna pay laing gipanid-ang giingong nagbuhi usab og nga menor edad nga ibaligya ngadto sa mga tawong gutom sa unod.

Si Chief Inspector Timmar Jamio Alam, hepe sa Naga City Police Station nga nahinabi sa mga tigbalita mibutyag nga ang tag-iya nagpapuyo og mga batan-ong babaye.

Apan ilang nasuta nga gihimo silang ‘paabangan’ sa maong tagbalay ngadto sa mga lalaking buot og lawasnong kalipay bugti sa bayad.

Matud ni Alam nga base sa ilang nadawat nga report nga dunay mga lalaking kostumer ang mosulod diha sa maong balay ug giingong mogamit sa mga babaye.

Ang dakbayan sa Naga nagpadayon karon sa higpit nilang kampanya batok sa cyber sex diha sa ilang dapit nunot niining mga nagsunod-sunod nga pagkasikop sa mga tawong nalambigit sa maong illegal nga kalihukan dinhi sa Sugbu.

Kahinumduman nga ang 78-anyos nga si Angelo Farina usa ka Australian national gipasakaan og kasong kalapasan sa Akta Republika 9208 kun “human trafficking” ug Akta Republika 7610 kun “child abuse” tungod sa giingong pagmolestiya niini og mga menor de edad. Sa gipahigayong operasyon sa kapolisan batok kang Farina lima ka menor de edad ang naaktohan diha sa balay niini nga giingong gihimo niyang mga ‘sex slaves.’  - BANAT NEWS