CEBU, Philippines - Nalandig sa tambalanan ang usa ka 18-anyos nga estudyante sa kolehiyo sa University of San Carlos human kini pusila sa duha ka wala mailhing tulisan nga mitulis kaniya kagahapon sa kaadlawon diha sa M.J. Cuenco Avenue, barangay Carreta, dakbayan sa Sugbo.
Ang usa sa mga suspetsadong tulisan nga si Rodel Narciso, 18, taga sitio Camansi, barangay Lorega dakbayan sa Sugbo nasikop sa gipahigayong hot pursuit operation sa kapolisan.
Si Narciso diha maapsi sa kapolisan sa dalan P. Del Rosario diin na-recover sa iyang posesyon ang .357 nga revolver nga dunay lima ka mga buhing bala.
Ang biktima mao si Algea Sebe, estudyante sa USC sa kursong Hotel and Restaurant Management ug lumad nga taga probinsiya sa Surigao nakaangkon og sumad pinusilan sa duha niya ka mga paa.
Si SPO4 Celso Seville sa Cebu City Police Office (CCPO) Theft and Robbery Section (TRS) mibutyag nga si Sebe uban sa laing lima ka pasahero sakay sa usa ka jeep nga pasaheroang dunay rotang 13C ang paingon unta sa downtown mga pasado alas 2:00 sa kaadlawon kagahapon.
Matud ni Seville nga ang drayber sa maong jeep mihunong diha sa usa ka gasoline station aron magpahangin sa ligid dihang upat ka wala mailhing mga lalaki kinsa duha kanila parehong armado ang kalit lang misaka sa jeep.
Ang duha ka mga armadong lalaki mideklarar og hold-up ug gipanguha ang mga cellphone ug uban pang mga butang sa mga pasahero.
Ang ubang mga biktima mao sila si Elaine Atillo, 20, nakuhaan sa iyang cellphone nga nagkantidad og P1,700; Dondon Asignar, 22, nakuhaan usab sa iyang cellphone nga nagkantidad og P5 mil, Crisencio Judaya, 46, nakuhaan usab sa iyang cellphone nga nagkantidad og P2,000.
Si Sebe mitunol sa iyang silver nga kwintas ngadto sa mga tulisan samtang si Erica Lagahit, 17, usa ka estudyante sa nursing sa USC mitunol usab sa iyang cellphone nga nagkantidad og P1,200 ngadto sa mga tulisan.
Apan ang mga tulisan walay nakuha gikan kang Mary Joy Antipuesto kinsa pasahero usab sa nahisgutang jeep.
Human madagit ang mga butang sa pasahero ang usa sa mga tulisan mipabuto sa pusil niini tumong ngadto sa jeep dayon daling nangikyas apan ang bala miigo sa dapi-dapi ni Sebe ug gidala sa Vicente Sotto Memorial Medical Center.
Si Seville nagkanayon nga ang nahisgutang mga tulisan posibleng mao usab ang mitulis sa usa ka jeep nga pasahero nga dunay rotang Talamban mga alas 8:00 sa gabii niadtong Sabado diha sa barangay Lorega diin usa ka 17-anyos nga babaye nga si Janne Michelle Lachica usa ka estudyante sa medical technology sa Velez College ang naangol sa maong hitabo.
Si PO2 Reynaldo Labating sa TRS mibutyag nga si Lachica sakay sa nahisgutang jeep dihang usa ka lalaking kadudahan ang lihok ang kalit misakay tungod sa stop light.
Giingong ang maong lalaki daw adunay gikuptang puloan sa kutsilyo diha sa iyang kilid giunhan niya kini og sukmag hinungdan sa ilang panagbugno diha sa sulod ug nakasamad sa iyang mga tuhod.
Ang maong lalaki milampos pagkuha sa cellphone sa biktima ug daling milayat ug miikyas, adunay mga tanod sa Lorega nga nakamatikod ug migukod kaniya apan nakaikyas kini.
Ang mga tanod miila sa maong suspek nga usa ka Reden Lambo nga taga sitio Itom Yuta, barangay Lorega kinsa padayon nila karong gipangita. - BANAT NEWS