Gwen nalipay Australyanong mihimong sex slave sa mga dalagita nadakpan

CEBU, Philippines - Gikalipay ni Gobernador Gwendolyn Garcia ang pagkasikop sa usa ka Australyanong kinsa giakusang mipahimulos sa upat ka mga menor de edad didto sa Inayagan, dakbayan sa Naga.

 Matud pa sa gobernador nga ang pagkasikop ni Angelo Farina, 78, magsilbing pasidaan niadtong mga tawo nga susama kaniya og pamatigayon.

Si Farina nadakpan sa kapolisan sa Naga uban sa mga sakop sa Children’s Legal Bureau sa miaging adlaw human matino sa mga otoridad ang ilegal nga pamatigayon niini, ug   nag-atubang na siya karon sa kasong trafficking in person ingon man kalapasan sa RA 7610 kon anti-child abuse law.

Sa imbistigasyon nga gihimo sa mga otoridad nasayran nga si Farina mihimo sa upat ka mga dalagita   nga mga “sex slaves” kon ulipon sa pakighilawas sa iyang kaugalingong balay sa Naga.

Gidayeg sa gobernador ang mga tinugyanan sa balaod ilabi na ang mga sakop sa Provincial Women’s Commission sa paningkamot niini nga maaresto si Farina.

Midugang ang gobernadora nga naglaum siyang mominus na ang mga human trafficker dinhi sa Sugbo tungod sa pagka-aresto ni Farina. (BANAT NEWS)