CEBU, Philippines - Gidid-an sa Provincial Environment and Natural Resources Office (PENRO) ang mga lokal nga kagamhanan sa kalungsoran ug dakbayan dinhi sa Sugbo nga dili magpataka og luwat og building permit sa mga estraktura nga tukoron sa daplin sa kasapaan ug kabaybayonan.
Kini aron mokibra ang suliran sa mabiktima sa baha dinhi sa lalawigan ilabi na karong panahona nga wala nay klaro ang lakaw sa panahon.
Ang hepe sa PENRO Richard Abella mibutyag sa Banat News nga ang mga lokal nga opisyal sa kagamhanan maoy sagad mabasol kung may madisgrasya sa baha tungod kay sila ang nagtugot niini nga makapuyo ang mga biktima sa mga lugar nga peligro sa baha.
Gitumbok ni Abella ang daghang mga edipisyo sa daplin sa sapa ug sa baybayon dinhi sa dakbayan sa Sugbo ug ingon man sa siyudad sa Talisay nga nakatampo sa suliran kun mobundak na ang kusog nga ulan nga makamugna og baha.
Padayong gipahimangnoan sa PENRO ang mga lokal nga kagamhanan sa higpit nga pagpatuman sa 20 meter easement gikan sa baba o tampi sa sapa o baybayon aron dili mabara ang agas sa tubig baha sa panahong mobundak ang uwan
Giangkon ni Abella nga igo lang sila sa pagpahimangno gumikan kay ang lokal nga kagamhanan mao man ang may gahum pagkontrol sa mga tukorong edipisyo ilabi na sa pagluwat og building permit. (WC) (BANAT NEWS)