Duha ka suspetsadong pusher tiklo

CEBU, Philippines - Duha ka gikatahapang pusher og shabu nadakpan sa kapolisan uban sa 13 ka pakete nga gituohang shabu   didto sa barangay Upper Labogon, dakbayan sa Mandaue sa miaging gabii.

Ang nadakpan mao si Lindsay Fores Ermac, 35, ug Ramir Corbo, 36, pulos taga barangay Cambaro sa maong dakbayan.

Si Inspector Henrix Bangcoleta nga maoy hepe sa City Anti Illegal Drug Task Force (CAIDSOTF) maoy nangulo sa maong buy bust.

Nasayran nga si Ermac dugay nang gipanid-an sa kapolisan bahin sa iyang bisyo nga pagpamaligya og shabu.

Sa lugar nga maoy estambayanan ni Ermac didto puntariya ang grupo sa kapolisan nga migamit og police decoy nga nagpakaaron- ingnong pumapalit og shabu.

Migamit kini og P300 nga marked money nga maoy gibayad ngadto kang Ermac bugti sa usa ka paketeng shabu.

Sa pagtunol ni Ermac sa shabu ngadto sa police decoy, diha-diha giposasan dayon kini sa mga otoridad ug dihang girikisa ang kalawasan niini nasakmit usab sa kapolisan ang lain pang walo ka pakete nga gituohang shabu.

Si Corbo nga kauban ni Ermac niadtong higayona wala makalingkawas sa kapolisan kay dihang   gihiling ang iyang lawas nagluklok usab diay siya og upat ka paketeng gituohang shabu. Ang duha gisikop sa kapolisan ug gidiretso pagbalhog sa prisohan.

Pasakaan sila og kaso gumikan sa paglapas sa Republic Act 9165 kon Comprehensive Dangerous Drug Act of 2002.  (BANAT NEWS)