Duwaang makadaot sa bata naa sa Sugbo

CEBU, Philippines - Gipahimangnoan sa usa ka grupo ang mga ginikanan nga dili magpasagad sa pagpamalit og mga duwaang wala masiguro ang kaluwasan gikan sa mga gipanggamit nga materyales tungod sa epekto niini sa pangisip sa ilang mga anak.

Ang kadaghanan niining makadaot sa utok nga mga duwaan dinhi ra gihimo sa Sugbu ug nagpasad karon sa nagkadaiyang mga tindahan sa barato nga presyo.

Ang grupo sa EcoWaste Coalition ug Philippine Earth Justice Center ug International POPs Elimination Network (IPEN) sa gihimong public forum sa University of Cebu-Banilad kagahapon mipahimangnong kinahanglang magmatngon ang mga konsumidor.

Si Dr. Joseph Digangi sa IPEN nagkanayon nga sa unang pagtan-aw daw walay epekto sa bata ang pagduwa sa mga duwaang adunay makadaot nga kemikal sanglit di kini makita sa gawas sa panglawas apan diha sa sulod sa pag-develop o pagtubo sa utok ug pangisip sa mga bata.

Atol sa pagsusi ni Digangi sa mga duwaang iyang gipamalit sa nagkadaiyang mga tindahan dinhi sa Sugbu kadaghanan kanila pulos adunay makadaot nga kemikal base sa migawas nga resulta sa eksaminasyon gamit ang modernong x-ray fluorescence (XRF) analyzer.

Ang XRF maoy ekipong gigamit sa nagkalain-laing sektor lakip na ahensya sa gobiyerno sama sa US Environmental Protection Agency ug Consumer Products Safety pagsusi sa kalidad ug kaluwas sa mga produkto diha sa merkado.

Nasuta kagahapon nga daghang mga gipamaligyang duwaan dinhi sa Sugbu ang delikado sa mga bata tungod sa kataas sa mga gisagol nga kemikal sama sa antimony, arsenic, cadmium, chromium, lead ug mercury.

Pipila niini nakita diha sa mismong mga baso, sudlanan sa mga candy, duwaang bangkil sa bampira ug uban pa. (BANAT NEWS)