CEBU, Philippines - Usa ka kolumnista sa lokal nga mantalaan dinhi sa Sugbu ang napalgang patay sulod sa iyang giabangang apartment kagahapon sa alas-10 pasado sa buntag diha sa Sanson Road sa barangay Lahug siyudad sa Sugbu.
Si Emmanuel Amador, 48, lumad nga taga Makati City apan kasamtangan nag-abang og apartment diha sa nahisgutang lugar. Si Amador igsuon sa artistang si Pinky Amador sa ABS-CBN.
Si Amador usa ka music instructor sa Salonga School of Rock ug kolumnista usab sa Cebu Daily News (CDN).
Usa ka Jake Sungahid kauban sa biktima mitug-an sa kapulisan nga iyang gibisita ang biktima kagahapon sa buntag tungod kay katapusang mipakita si Amador sa Salonga niadto pang Lunes sa gabii ug wala na kini mopakita.
Iya kining gisigehan og text ingon man tawag sa cellphone apan sige lang og bagting ug dili tubagon.
Sila si Sungahid ug Donque maoy mipugos og abli sa main door sa silong aron sila makasulod paingon sa kwarto ni Amador apan dihang ilang naablihan patay na kini ug nagsugod na og kadugta.
Base sa pasiunang impormasyon sa kapolisan giingong diabetic si Amador ug gituohang may sakit sa kasingkasing ug posibleng giatake kini ug wala mabantayi sanglit gituohang tulo na kini ka adlaw namatay.
Si SPO4 Alex Dacua miingon nga wala silay nakitang timailhang may foul play sa kamatayon ni Amador. (BANAT NEWS)