Negosyante gi-ambush patay

CEBU, Philippines - Patay ang usa ka negosyante human kini gibanhigan diha sa Ouano Avenue duol sa Cebu International Convention Center sa dakbayan sa Mandaue kagahapon sa hapon.

Ang biktima mao si Antonio Ouano, 69, residente sa Ouano Wharf sa barangay Looc dakbayan sa Mandaue. Si Ouano kabanay sa political clan nga mga Ouano sa maong dakbayan ug anak sa tag-iya sa Ouano Wharf.

Base sa imbestigasyon sa kapolisan, nasayran nga mga alas 2:15 kagahapon sa hapon gikan si Ouano ug ang iyang sekretarya nga si Nene Mangubat sa Palace of Justice sa dakbayan sa Mandaue gumikan sa ilang hearing sa kaso kalabot sa yuta.

Matud pa sa mga polis luwan si Ouano ug ang sekretarya sa usa ka Hilux Land Cruiser nga adunay plakang GSC-980 padulong motambong sa laing hearing sa korte sa RTC Branch 28 sa dakbayan sa Mandaue niadtong tungura.

Apan gikatahong sa pag-abot sa crossing sa Ouano Ave. sa kilid nga bahin sa CICC usa ka lalaking luwan og motorsiklo ang kalit nga miduol kanila ug namusil.

Buak ang windshield sa driver seat ug milagbas ang bala niini sa kilid nga bahin sa lawas ni Ouano. Si Ouano nahiagum og tulo ka samad pinusilan sa iyang walang kilid.

Dali kini nga gidala sa Mandaue City Hospital apan sa pipila ka gutlo nakabsan kini sa kinabuhi. Samtang si Mangubat nakalingkawas.

Ang mga sakop sa Scene of the Crime Operations nakakuha og lima ka basiyo sa bala sa gituohang kalibre .45 ug ingon man slugs sulod sa sakyanan sa biktima.

Ang mga imbestigador nga naghikay sa maong kaso gikan sa Investigation and Detective Management Branch sa Mandaue City Police Office pinangulohan ni PO3 Dionesio dela Peña wala pay matumbok si kinsa ang mamumuno o utok sa maong krimen.

Ang ig-agaw sa biktima nga si Bokal Thadeo “Teddy” Ouano sa report sa Balitang Bisdak kagahapon nagkanayon nga maayong tawo ang biktima apan nagtuo silang posibleng may koneksyon sa mga kaso niini sa korte ang maong krimen. (EIM)(BANAT NEWS)