Peligrong lugar gibantayan sa ACERT

CEBU, Philippines - Higpit nga gipanid-an karon sa mga sakop sa Accident Control and Emergency Rescue Team (ACERT) sa dakbayan sa Mandaue ang mga barangay nga nahimutang sa kakuyaw nga ibanlas sa baha niining nagpadayon nga pagbunok sa kusog nga ulan.

Si Mario Perez, ang pangulo sa ACERT ug mao usab ang gihimong kumander sa City Disaster and Coordinating Council (CDCC) mibutyag sa Banat News nga inigbundak gyud sa kusog nga uwan ipadala dayon niya ang iyang mga sakop sa mga barangay nga anaa sa peligrong mga lugar uban ang pag-awhag sa mga   molupyo sa paghiklin ngadto sa luwas nga dapit.

Gani niadtong Miyerkules sa hapon dihang mikusog ang uwan ilang giluwas ang lima ka tinun-an   ug walo ka magtutudlo sa Guizo Elementary School tungod kay milunop ang maong lugar. Matud pa niya nga ang maong mga tinun-an ug magtutudlo   mao nalay nahibilin sa maong tulunghaan sanglit ang kadaghanan namauli na man sa ilang panimalay.

Si Perez miingon nga ang gi-monitor nila pag-ayo karon mao ang Mahiga Creek sa barangay Subangdaku, barangay Tipolo, barangay Guizo, barangay Mantuyong, barangay Paknaan, barangay Banilad ug uban pa. (BANAT NEWS)