CEBU, Philippines - Usa ka 19 anyos nga dalaga kinsa liso og pangisip misumbong sa kapolisan nga ang amahan sa iyang gisabak mao ang iyang maguwang lalaki kinsa miunay paglugos kaniya didto sa ilang pinuy-anan sa usa sa mga lungsod sa Tabogon.
Ang biktima gitago lang sa ngalang Russel, kinsa nagsabak og tulo ka buwan ug mipa-blotter sa kapolisan sa maong hitabo.
Iyang gisaysay nga niadtong Marso niining tuiga, nag-inusara siya sa ilang balay nianang buntag, dihang miabot ang iyang igsuong lalaki nga si Rodelo Villazorda.
Matud pa sa biktima nga kalit siyang gibitad niini ug gidala sa kuwarto diin didto gipahimuslan ang iyang pagkababaye.
Ang kapulisan mipa-eksamin sa biktima sa Pink Room sa Vicente Sotto Memorial Hospital dinhi sa dakbayan sa Sugbo aron pagtino sa iyang sumbong.
Sa laing bahin, laing 19-anyos usab nga dalaga nga taga Samboan misumbong usab sa kapolisan kay gilugos usab siya sa iyang silingan niadtong Marso ug tulo na ka buwan karon ang iyang gisabak.
Unya usa ka 79 anyos nga lolo nagtingkagol karon sa prisohan sa Mabolo ning dakbayan sa Sugbo human siya ikiha sa pagpanglugos niya sa 9 anyos nga tinun-an.
Ang biktima mitug-an sa kapolisan nga makadaghan siya hilabti sa maong manlulugos.(WC) (BANAT NEWS)