CEBU, Philippines - Tulo ka mga lalaki nga gipasanginlang namaligya og ilegal nga drugas ang nadakpan sa managlahing lugar atol sa duha ka buybust operation sa mga sakop sa Provincial Intelligence Branch (PIB) sa Cebu Provincial Police Office (CPPO) didto sa barangay Sunog ug Northern Poblacion sa lungsod sa San Francisco sa Isla sa Camotes sa miaging alas-5 sa hapon.
Ang nangadakpan mao si Pedro Miao Gonzaga taga barangay Sunog, Arcenio Ramirez Otido Jr. ug Haide Muaña taga Northern Poblacion .
Si Sr. Insp. Mark Gifter Sucalit, deputy sa PIB nga nahinabi sa mga tigbalita nagkanayon nakadawat sila og reklamo sa mga opisyal sa lungsod niadtong Lunes kabahin sa ilegal nga kalihukan ni Gonzaga.
Human mapositibo ang ilang surveillance batok ni Gonzaga sila si PO2 Sheilo Quimat mipalit og duha ka paketeng shabu kaniya sa kantidad nga P600 ug human madunol ang maong drugas gisikop kini dayon apan nakaikyas ang asawa niining ginganlan og Cecilia.
Nakuhaan og laing upat ka medium pack sa shabu si Gonzaga sa iyang posisyon. Human niini mitug-an kanila si Gonzaga nga si Otido usa usab sa namaligya og shabu sa maong lugar.
Matud ni Quimat human ilang nadakpan si Gonzaga ilaha kining gipangutana kung si kinsa pa ang laing namaligya og shabu ug gi-refer sila ni Otido.
Si Otido nga ilaha sab gipalitan og duha ka pakete nga shabu sa kantidad og P600 apan nahutdan kini ug gidala sila ni Muaña diin ang duha mao gyud ang naghikyad sa laing walo ka medium ug small packs nga gituohang shabu.
Nakuha usab og balik sa kapulisan ang ilang P1,200 nga kwarta nga ilang gigamit atol sa maong operasyon. Si Sucalit miingon nga level 2 drug pusher ang tulo ka suspetsado.
Ang asawa ni Otido nga nahinabi sa Banat News mihimakak nga namaligya og drugas ang iyang bana.
Lakip sa nakuha nga ebidensya ang duha ka cellphone sa mga suspetsado kinsa atua karun gibalhog sa detention cell sa Liloan Police Station samtang gipaabot nga pasakaan og tukmang kasong paghupot ug pagpamaligya og ginadiling drogas. - BANAT NEWS