CEBU, Philippines - Usa ka 24-anyos nga babaye mabdos og dul-an sa upat ka buwan human siya gi-among-amongan sa iyang silingan didto sa usa sa mga barangay sa lungsod sa Samboan.
Si Mila (tinuod pangalan gipugngan sa Banat News) giubanan sa iyang iyaan niadtong Miyerkules ug mi-report sa buhatan sa kapulisan sa naasoy’ng lungsod.
Ang biktima mitug-an nga niadtong Marso 25 niining tuiga gilugos siya sa iyang silingan nga usa ka minyo (pangalan gipugngan sanglit wa pa mapasakai og kaso).
Misaysay siya nga gihatagan siya og softdrinks sa suspek niadtong higayona apan pagkahuman niini nakatulog siya, nagduda siyang gibutangan og pangpakatulog ang maong ilimnon.
Human niini nakamata nalang siya sa usa ka kalibunan ug nabantayan niyang gilugos siya. Human sa tulo ka buwan diha nalang niya namatikdang namabdos siya hinungdan sa iyang pagdangop sa mga kabanay.
Tungod niini ang kapulisan mi-schedule sa biktima nga dad-on siya sa Pink Room sa Vicente Sotto Memorial Medical Center (VSMMC) aron matino kun nahilabtan ba gyud sa suspek ang biktima. - BANAT NEWS