Australian nanagop og mga menor gisikop

CEBU, Philippines - Nagtingkagol sa City of Naga detention cell ang usa ka Australian kinsa gikatahapang mimolestiya og mga menor de edad nga iyahang gipapuyo sa iyang balay sa sitio Santo Niño, barangay Inayagan sa nahisgutang siyudad.

Nasikop sa gipahigayong operasyon sa kapolisan sa Naga niadtong Miyerkules sa gabii si Angelo Farina, 78, usa ka Australian national apan base sa passport niini ang maong langyaw natawo sa Ostuni , Italy.

Sa maong operasyon dala sa mga polis ang search warrant batok kang Farina nga giluwatan ni Regional Trial Court (RTC) Judge Macaundas Hadjirasul sa Branch 8.

Na-recover sa mga polis gikan sa balay ni Farina ang duha ka syringe, duha ka vial sa injectable contraceptive ug mga hulagway ni Farina dunay kaubang mga batan-on.

Si Chief Inspector Timmar Jamio Alam, hepe sa Naga City Police Station sa pakighinabi sa mga tigbalita mibutyag nga dunay mga menor de edad nga mianha sa ilang buhatan ug misumbong nga puli-pulihon sila og ‘gamit’ sa maong langyaw.

Matud usab ni Alam nga sobra sa usa ka buwan nilang gipanid-an si Farina ug dihang ilang nakompirmar ang mga impormasyon niadtong Miyerkules mikuha sila og search warrant sa korte.

Atol sa operasyon naabtan sa mga polis diha sa balay ni Farina ang lima ka mga menor de edad kinsa nagpanuigon gikan sa 14-anyos ngadto sa 15-anyos apan usa niini ang midagan.

Ang upat ka mga menor de edad nga naluwas gidala sa mga polis ug gitugyan ngadto sa city social welfare.

Sa nahipos nga report sa kapolisan giingong pito ka batan-on ang gipapuyo ni Farina diha sa iyang balay.

Gibutyag ni Alam nga ang maong mga batan-on paiskwelahon sa langyaw, hatagan og kwarta, pakan-on ug pamalitan og mga gamit alang sa pag-iskwela.

Si Farina gikatakdang pasakaan og kasong kalapasan sa Akta Republika 9208 kon “human trafficking” ug Akta Republika 7610 kon “child abuse”.

Ang mga tigbalita misuway og kuha og pamahayag kang Farina diha sa detention cell apan wala kini makig-estorya ug ang nakapakugang sa mga tigbalita ang sunod nga gibuhat niini.

Ang maong langyaw mikuha og silhig ug gitusmod sa tubig sa pansayan ug gisablig ngadto sa mga tigbalita.

Sa laing bahin, ang mga inahan sa duha ka mga menor de edad nga nahinabi sa mga tigbalita kagahapon nanalipod sa langyaw tungod sa kadako sa natabang niini sa pagpatungha sa ilang mga anak. - BANAT NEWS