8 sitio sa Guadalupe may kalamidad

CEBU, Philippines - Mimando na si Mayor Michael Rama sa Department of Engineering and Public Works (DEPW) nga susihon ang dapit sa Monterrazas de Cebu nga nahimutang sa barangay Guadalupe gumikan sa pasangil sa ubang tawo nga giingong naggikan sa maong dapit ang grabeng baha nga nakaapekto sa nagkadaiyang dapit sa maong barangay niadtong Miyerkules sa hapon.

Nasayran nga ipaubos sa state of calamity sa mga opisyal sa Guadalupe ang walo ka mga sitio sa maong dapit gumikan sa grabeng baha.

Kini naglangkob sa sitio Kamanggahan, Sampaguita, Kasagingan, Guadalajara, Guadaville, Kalubihan, Buena Hills ug Tubigan. Gipadayag ni kapitan Michael Gacasan nga dili pa matino kung pila ka pamilya ang naapektohan ingon man usab ang danyos niini sanglit nagpadayon ang gibuhat nila nga monitoring.

Sa sitio Buena Hills moabot ngadto sa dul-an sa napulo ka balay ang nasudlan sa tubig ug matud pa lapas liog ang gilawmon sa baha hinungdan sa grabeng kadaot sa ilang mga kabtangan nga ilang nahiaguman.

Pipila niini ang nangatkat nalang sa ikaduhang andana sa ilang balay gumikan sa kataas sa level sa tubig.

“Sukad-sukad, karon pa to nahitabo nga grabe kaayo ang baha sa amo. Paspas gyud kaayo ang flow sa tubig, ang among mga butang puros nangabasa,” matud pa sa usa ka residente sa maong dapit nga si Baby Lee nga nahinabi dinhi sa Banat News.

Gisaysay ni Lee nga dako ang iyang pagtuo nga ang maong baha nagagumikan sa gi-develop nga yuta sa Monterrazas.

Samtang ang Vice President for business development sa Genvi Development Corporation nga maoy developer sa Monterrazas de Cebu nga si Lormillo Galo mipadayag nga moabag sila sa kutob sa ilang mahimo sa mga naapektohan sa baha. Giklaro hinuon ni Galo nga dili tanang tubig ang naggikan sa ilang site sanglit duna pa’y laing mga subdivision nga nahimutang sa silingan nila nga dapit .

Nasayran nga nilapaw ang tubig sa retention pond sa Monterrazas hinungdan mibuga kini og daghang tubig apan giklaro sa kadagkoan sa maong site nga dili kini malikayan sanglit kusog lang gyud ang uwan niadtong higayona.

Ang detention pond maoy mopugong sa tubig aron dili kaayo kusog ang pagsubay niini sa agianan sa tubig.

Gitataw hinuon ni Galo nga usa sa ilang target karon aron malikayan pa ang grabeng pagbaha mao ang pagpalapad sa drainage system.

Nasayran nga naapektohan usab sa pagbaha sa miaging adlaw ang Banawa Elementary School kung diin upat gyud ka lawak ang nasudlan sa tubig hinungdan nga nabasa ang mga gamit niini.

“Maayo na lang gani, kay nagsugod ang baha 20 minutes human namuhi na sa ilang klase ang mga bata. Among gibuhat karon kay nakig-coordinate na mi sa barangay,” sumala pa sa principal sa maong tunghaan nga si Marianilva Hermosa.

Ang ubang dapit sa siyudad sa Sugbo nga naapektohan sa baha naglangkob sa pipila ka mga dapit sa barangay Banilad, Mabolo, Carreta, Duljo Fatima, Bulacao, Camputhaw ug sa Kalunasan kung diin dunay nahitabong gamay nga landslide ug usa ka panimalay ang nadanyos apan walay naapektohan niini.  - BANAT NEWS