CEBU, Philippines - Si 6th district Congressman Gabriel Luis Luigi Quisumbing mipadayag og kahinangop sa pagtambong sa mga dagkong opisyal ug lider sa lokal nga kagamhanan sa ika-unom nga distrito ilabi na gyud kang Mayor Jonas Cortes sa dakbayan sa Mandaue atol sa pagsaulog sa iyang adlaw’ng natawhan sa miaging adlaw.
Matud pa ni Quisumbing nga maayo kaayo ang ilang pagtinagdanay ni Mayor Cortes sa maong salo-salo nga giandam sa iyang inahan.
Miingon si Quisumbing nga ang pagtinahoray nila sa usa’g-usa mao gayuy mopatigbabaw sa bisan asang dapit sila magkauban.
Kini luyo sa kamatuoran nga usahay magkalahi ang ilang prinsipyo ug baruganan sa usa ka isyung politikanhon nga mosulbong sa mga dapit nga susama nilang gi-alagaran.
Hinuon gitataw ni Quisumbing nga mahimong lahi lamang ang iyang baruganan bahin sa gisugyot nga paghimong lone district sa dakbayan sa Mandaue kay sa gustong lakang nga himoon ni Mayor Cortes.
Apan wala magpasabot nga bisan ang ilang personal nga relasyon maapektohan sa maong isyu.
Hinuon miingon si Quisumbing nga atol sa ilang panagtagbo sa iyang birthday wala gyud sila maghisgot og isyung politikanhon.
Gawas kang Mayor Cortes, mitambong usab sila si Cordova Mayor Adelino Sitoy ug Consolacion Mayor Teresita Alegado sa maong okasyon.
Miingon si Quisumbing nga labi siyang madasig kun sa panagsang higayon magkauban ug magkasalo-salo sila uban sa mga lider sa ika-unom nga distritio sa lalawigan sa Sugbo. - BANAT NEWS