Estudyante sa 6th dist. gihataga'g scholarship

CEBU, Philippines - Mikapin 1000 ka mga tinun-an gikan sa sixto distrito ang nakapahimulos sa scholarship assistance program ni 6th district Cong. Gabriel Luigi Quisumbing kinsa nanumpa didto sa Norkis Park sa siyudad sa Mandaue sa miaging adlaw.

Si Quisumbing mao mismo ang nangunay sa pagpapanumpa sa maong mga tinun-an sa kolehiyo nga naggikan sa siyudad sa Mandaue, lungsod sa Cordova ug Consolacion   uban sa ilang mga ginikanan. Gipasabot ni Quisumbing nga ang maong education program dili full scholarship kay ang iyang buhatan mohatag lang og P2,500 matag semester sa matag usa ka scholar sa iyang distrito.

Kini ang hinungdan nga ipaagi sa Department of Social Welfare and Development (DSWD) ang maong pundo tungod kay gahin man kini sa matag kongresista nga gikan sa ilang Priority Development Assistance Fund (PDAF.)

Gawas niini gipahibawo usab ni Quisumbing nga ang dugang pundo alang sa maong programa maggikan usab sa Department of Education (DepEd) ug sa iyang kaubang kongresista sama sa PBA Partylist Representative Mark Zambar kinsa miduyog sa maong kalihukan.

Dugang pa sa kongresista sa ika-unom nga distrito nga usa sa iyang prayoridad nga proyekto karon mao ang edukasyon kay mao kini ang maghatag og maayong kaugmaon sa mga kabataan.  - BANAT NEWS