Molapas sa jaywalking multa P1,000
CEBU, Philippines - Usa ka resolusyon nga mopabug-at sa silot sa malapason sa “anti jaywalking ordinance” pinaagi sa pagpabayad og kutob sa P1,000 segun sa gibug-aton sa kalapasan, giduso ni Konsehal Richard Osmeña sa konseho.
Kun maaprobahan, ang P50 nga multa nga maoy pabayran sa malapason karon, himoon nang P200 ngadto sa P1,000.
Nagtuo si Osmeña nga mao lamang kini bugtong paagi nga mapitol ang mga malapason sa balaod kansang kinabuhi naglatay sa usa ka lugas lanot iniglabang niini sa karsada diin nagbadhas ang mga sakyanang de motor.
Ang maong ordinansa nagbuot nga kadtong walay kuwarta nga ikabayad sa multa mogahin og upat ka oras nga community service nga dumalahon sa Cebu City Traffic Operation Management (CITOM). Nasayran nga niadtong Pebrero tuig 2000 pa, ang katapusang pagpausbaw sa multa sa “Anti –Jaywalking Ordinance” busa angayan na kining usbon karong panahona, sumala ni Osmeña.
“A higher penalty and administrative fine would certainly discourage people from violating the Anti –Jaywalking Ordinance,” suma pa sa konsehal.
Dugang pa niya nga kinahanglan nga aduna gyu’y responsibilidad ang tawo sa paglabang sa kadalanan pinaagi sa pagtuman sa balaod sa trapiko aron mamintinar ang kahapsay sa dagan sa mga sakyanan sa kadalanan ning siyudad, matud pa niya. - BANAT NEWS
- Latest
- Trending
