Mga polis gikapkapan sa German

CEBU, Philippines - Mibahad nga mopasaka og kaso ang mga polis sa Talisay City Police Station (TCPS) batok sa usa ka German national nga mikapkap ug namasangil kanila nga mikuha sa €10 (Euro) niini nga kwarta.

Ang mga gipangkapkapan ug gipasanginlan mao sila si PO3 Ferdinand Pablo ug PO1 Euwen Pitogo sa usa ka German national kansang pangalan wala ibutyag sa mismong kapuyo niining si Danielene Villegas, 42, kinsa mao usab ang reklamante batok sa langyaw.

Ang maong mga polis una nang miresponde niadtong Domingo diha sa balay sa German tungod sa pagpanglungkab nga nakuhaan sa ilang usa ka unit nga play station (PSP) nga color blue, Myphone nga cellphone, camera (Lumix), mga alahas ug kwarta nga P5,000.

Nianang pagkabuntag sa adlaw’ng Lunes mipahigayon og ocular inspection uban sa usa ka gwardiya sa subdivision sila si Pitogo ug Pablo sa balay sa maong German.

Apan sa ilang pagpanggawas giingong gipangkapkapan sila sa maong German ug giablihan ang ilang mga backpack tungod kay nawagtang ang 10 Euro niini.

Giangkon ni Pitogo nga duna siyay P8,500 diha sa iyang bulsa nga nakapkapan sa German apan kini kabahin sa iyang nakobra nga sweldo. Ang nakapasakit sa buot ni Pitogo dihang giingong giingnan siya sa langyaw og “much money.”

Si Chief Inspector Eddie Recamara, officer-in-charge sa TCPS nagkanayon nga seryoso kaayo ang maong pasangil batok sa iyang mga sakop ug nagpakauwaw kini dili lang sa TCPS lakip na sa tibuok organisasyon sa Philippine National Police (PNP).

Matud ni Recamara nga aduna siyay imbestigasyong himuon batok sa maong mga polis kabahin sa pasangil apan kung ilang mapamatud-ang gibuhat-buhatan ra sila og sala ilahang kasohan ang maong langyaw. (BANAT NEWS)