CEBU, Philippines - Dul-an sa usa ka gatus ka mga molupyo sa lungsod sa Alegria ang gituohang nasakit og tipos sulod lang sa usa ka semana nga ang gidudahang hinungdan mao ang tinubdan sa tubig mainom sa mga residente.Subay sa rekord sa Integrated Provincial Health Office (IPHO) mitala na og 80 ka kaso sa gidudahang typhoid fever (tipos) sa maong lungsod sulod lang sa milabay’ng semana.
Si Jean Lerio, nurse sa Municipal Health Office sa Alegria dihang nahinabi sa Banat News mikompirmar nga adunay 80 ka kaso sa nasakit diha sa ilang lungsod nga naglangkob sa hilanat pag-ubo-ubo ug sip-on sa ilang lugar.
Partikular nga gitumbok ni Lerio ang mga residenteng gikan sa sitio Inghoy sa barangay Valencia nga nagdungan- dungan og hilanat ang mga molupyo.
Niadto lang adlaw’ng Sabado atol sa gihimo nilang inspeksiyon miabot sa 20 ka tawo ang nadugang sa ilang talaan sa nasakit nianang adlawa. Ang ubang mga lugar nga apektado sa pagsiaw sa maong matang sa sakit mao ang barangay Madredijos, duna say ubang barangay nga wala na hinganli nga adunay nangasakit usab apan dili makaalarma.
Ang mga pasyenteng nakasinati og mga paghilanat, pag-ubo ubo ug sip-on gikan lang niadtong niaging semana.
Matud ni Lerio dili pa sila makakompirmar kun sakit nga tipos ba ang mitakboy sa mga molupyo sa ilang lugar hangtud nga dili makompirmar sa Department of Health (DOH).
Si Lerio nagkanayon nga kagahapong adlawa unta ang schedule sa mga personnel sa DOH pagbisita sa ilang lugar aron pagkuha og mga blood samples sa mga pasyente pagtino kun sakit ba kini sa tipos apan na-postpone kini karung adlawa.
Sa labing uwahing report dunay walo ka pasyente gikan sa maong lungsod ang pabiling nalandig sa Badian District Hospital. (BANAT NEWS)