CEBU, Philippines - Tungod sa panagbangi sa kabiling yuta sa ilang mga ginikanan usa ka ginang ang giunay og pusil patay sa manghod niining lalaki diha sa barangay Togonon sa siyudad sa Danao sa ala 1:00 sa hapon niadtong Domingo. Ang biktima mao si Teresa Kapuno Sapa, 47, samtang ang suspek mao ang iyang manghod nga si Teotimo Kapuno, pulos molupyo sa nahisgutang lugar.
Matud ni SPO2 Matias Galo, desk officer sa Danao City Police Station dihang nahinabi sa Banat News subay sa imbestigasyon ang biktima nanglaba sa gawas nga bahin sa ilang balay dihang kalit miabot ang igsuon niining lalaki.
Giingong walay daghang estorya ang suspek nga nagdala og wala matinong kalibreng armas mipusil dayon duha ka higayon sa biktima. Sa pagkaigo sa walang bukton natumba kini apan gitiwasan kini og pusil diha sa kilid ug human niini daling midagan ang suspek ug wala na maabti pa sa kapolisan.
Ang biktima gitabang sa mga silingan ug gihatud sa tambalanan apan gideklarar nga dead on arrival (DOA).
Sa pasiunang imbestigasyon sa kapulisan nasuta nga ang kabilin nga yuta gikan sa mga ginikanan sa biktima ug suspek ang gikasungian nilang duha tungod kay gituohang wala kini matarong og bahin. Ang kapulisan nagpadayon pa sa ilang man-hunt operation pagsikop sa nagtagotago nga suspek. (BANAT NEWS)