Driver ni Gov. Lito nakapusil

CEBU, Philippines - Usa ka mekaniko naangol human kini pusila sa drayber sa kanhi gobernador sa lalawigan sa Sugbo didto sa sitio San Roque sa barangay Basak, dakbayan sa Lapulapu sa miaging kaadlawon.

Ang biktima mao si Justine Quano, 36, minyo, nga nagpuyo sa maong dapit ug giila lang sa ngalan nga Eden ang suspetsado kinsa giingong drayber ni kanhi Cebu Governor Lito Osmeña.

Si PO2 Carlos Barluado sa homicide section sa kapolisan sa maong dakbayan nga nahinabi sa Banat News miingon nga nagsakay og motorsiklo ang suspek nga nagsunod sa motorsiklong gisakyan sa biktima.

Dihang naapsan kini sa maong dapit, gipusil dayon ang biktima hinungdan nga nasabak ang aping ug tuong bukton niini. 

Ang biktima gihatod dayon ngadto sa Vicente Sotto Memorial Medical Center sa dakbayan sa Sugbo ug padayon kining giatiman sa mga doktor.

Si PO2 John Carlo Jocotan sa homicide section sa kapolisan sa maong dakbayan miingon nga daan nang nagkadumot ang duha gumikan sa personal nga bangi.

Padayong gipangita karon sa kapolisan ang suspek.(WC) (BANAT NEWS)