Puya gitagak

CEBU, Philippines - Gipangita karon sa kapolisan ang usa ka puting pickup-type multicab nga giingong gisakyan sa duha ka mga tawong miitsa sa usa ka puya diha sa taytayan sa barangay Pandan sa dakbayan sa Naga kagahapon sa buntag.

Ang maong multicab kansang plate number wala makuha sa testigo nga nakakita sa paglabay gihulagway lang nga kolor puti nga may mga sagol nga kolor green ug pula ang atop ug daling miikyas padulong sa Poblacion, Naga.

Sumala pang PO1 Ronjie Nadorra sa Naga City Police Station nga gikahinabi sa Banat News nga nagpadayon karon ang ilang pag-trace sa maong sakyanan aron patubagon sa ilang krimen ang duha ka hamtong.

Base sa pamahayag nga nakuha sa kapolisan usa ka lalaking gibana-banang 50-anyos ang pangidaron ug usa ka babayeng wala mokanaog sa multicab ang mihimo sa krimen.

Matud pang Nadorra, si Maldofe Villejo, residente sa maong dapit kinsa anaa sa sapa nianang tungura sa may tiilan sa taytayang gibana-banang kapin sa 15 ka tiil ang gihabugon maoy nakaakto sa paglabay sa babayeng puya. Giingong gisampit pa sa maong lalaki si Villejo sa pag-ingon nga “Nay tabi nay!” apan dihang gitubag ni Villejo pagpangutana kung hugaw ba sa tawo ang sulod sa maong plastic bag gihagbong na kini dayon sa maong lalaki dayong mitalikod.

Ang plastic bag adto motugpa sa usa ka bato ug mao nalay kakurat ni Villejo nga mihilak ang sulod niini ug mikisi-kisi. Tungod niini daling midagan si Villejo pagsusi sa sulod niini nga giputos pud og kolor orange nga tualya apan nakurat siya nga usa kini ka bata nga aduna pay pusod.

Daling mitawag si Villejo sa mga opisyales sa barangay pinangulohan ni Kapitan Rogelio Alinsunorin kinsa mao say mitawag sa kapolisan.

Ang mga sakop sa Womens Desk ug Department of Social Welfare and Development mikuha sa maong puya nga gibana-banang nagpangidaron og unom ngadto sa pito ka buwan apan namatay na kini. Ang kagamhanan sa Naga maoy moabaga sa pagpalubong sa maong puya nga gipanganlan og Baby Angel.  (BANAT NEWS)