CEBU, Philippines - Hingpit na nga tukoron sa barangay Umapad, dakbayan sa Mandaue ang ilang kaugalingong Material Recovery Facility (MRF) sanglit hingpit na usab sila nga nakabaton og luna nga pahimutangan niini.
Si Umapad Barangay Kapitan Nelson Rubio nga nahinabi sa Banat News miingon nga sa kasamtangan ilaha nang giandam ang desinyo sa pagatukoron nilang MRF nga hayan masugdan karong bulan sa Agosto niining tuiga.
Gipasabot ni Kapitan Rubio nga human sa ilang pagbaton og desinyo sa pagatukoron nilang MRF maoy ilang gihimo ang paghikay sa mga dokumento alang sa paggamit sa gahin nga P100,000 nga naggikan sa kagamhanan sa maong dakbayan.
Si Rubio mitataw nga ang maong kantidad nga gihatag ni Mayor Jonas Cortes ngadto sa ilang barangay mao lamang ang magamit nilang gahin sanglit wala man sila malakip sa nakabaton sa P50,000 nga salapi gikan sa kagamhanan sa lalawigan sa Sugbo.
Dugang pa niya nga ang kakulang sa mga dokumento alang sa pagdawat sa maong kantidad nga gihatag ni Gobernador Gwendolyn Garcia maoy hinungdan nga ang barangay Umapad napakyas usab sa pagdawat niini.
Sa nasayran nga ang barangay Umapad maoy usa sa 12 ka barangay sa dakbayan nga napakyas sa pagpatukod og kaugalingong MRF.
Kini ang nakaaghat sa environmentalist advocate nga si Atty. Benjamin Cabrido sa pagluwat og mga pamahayag nga nagbahad sa pagpasaka og kaso batok sa mga opisyal sa barangay kinsa napakyas sa pagpatuman sa Republic Act 9003 kon Solid Waste Management Act of 2003 nga naglatid sa tukmang paghipos sa mga basura. - BANAT NEWS