Mga patigayon ug subdivision pabutangan og CCTV

CEBU, Philippines - Miduso og ordinansa si Konsehal Sisinio Andales nga magmando sa tanang balay patigayon ingon man usab mga subdivision nga magbutang og closed-circuit television (CCTV) camera aron dali ra masumpo ang mga sa nagkadaiyang krimen sama sa pagpanglungkab.

Sa sugyot ni Andales, kini nagkanayon nga ang pakyas sa pagbutang og CCTV camera sa ilang mga establisamento mag-atubang og silot ug usa na niini ang posibleng pagsira ug pagbawi sa ilang business permit o ba kaha mobayad sa penalty fee nga nagdepende sa gidak-on sa pagsupak niini.

Hinuon dunay 120 ka adlaw ang mga tag-iya sa mga business establishment ug sa mga developers sa subdivision sa pag-comply sa ordinansa sa higayon nga maaprobahan na kini sa konseho.

Kung ma-implementar na ang maong plano, butangan og sticker ang matag establisamento nga nasusi na isip timaan nga dunay CCTV camera na kini.

Buhaton usab ang tinuig nga inspection sa mga CCTV camera aron masuta kung nag-andar pa ba kini o wala.

Posible nga himuon usab nga pasiunang rekisitos ang pagbaton og CCTV camera sa dili pa mo-renew sa ilang business permit ang mga negosyante.

Base sa maong proposed ordinance, kinahanglan nga ang tag-iya sa balay patigayon o ba kaha ang developer sa subdivision mohipos sa ilang surveillance tapes nga ilang nakuha sa 30 ka adlaw ug automatic nga ila kining ipasa sa kapolisan kung dunay mahitabo nga krimen sa ilang dapit.  - BANAT NEWS