Mga dating ug networking site sinugdan sa cybersex?
CEBU, Philippines - Mga social networking site ug internet dating site ang usa sa gitumbok sa kapolisan nga sinugdanan sa cybersex tungod sa legalidad niini dunay mga tawo nga mopahimulos sa higayon ug mopahigayon og mga ilegal nga transaksiyon.
Si Superintendent Rodolfo Albotra Jr., hepe sa Provincial Intelligence Branch (PIB) mipahimangno sa tanang mga user ug miyembro sa maong mga internet sites nga magmabinantayon sa pagbutang sa ilang mga hulagway ug video aron dili sila mahimong biktima sa umaabot.
“Cybersex is made due to poverty but it’s not a reason to moral degredation”, ni Albotra pa.
Si Albotra nanawagan usab sa publiko nga motabang sa kapolisan pinaagi sa pagkamabinantayon kabahin sa cybersex.
Kahinumduman nga ang grupo ni Albotra naka-rescue og tulo ka mga menor de edad ug tulo ka mga babaye ang ilang nasikop sa ilang gipahigayong pagpangronda niadtong Hulyo 12, 2011 diha sa usa ka balay nga giingong cybersex den sa barangay Cogon, lungsod sa Cordova.
Ang maong mga menor de edad nga nagpanuigon og 9, 12 ug 17 ang naa karon sa Department of Social Welfare and Development (DSWD).
Ang maong mga biktima gikataho nga pahubuon atubangan sa web cam ug bayaran og P200 ngadto sa P300 matag sesyon.
Ang maong insidente maoy ikaduhang higayon diin niadtong Hunyo 1, 2011 ang operatiba sa National Bureau of Investigation (NBI) ubos sa pag-ayuda sa United States Department of Homeland Security misikop sa magtiayon kinsa miunay sa ilang mga menor de edad nga anak paglawog sa cybersex. - BANAT NEWS
- Latest
- Trending
