Naga ug USC nagkasabot sa pagtuon sa basura alang sa bio-fuel

CEBU, Philippines - Ang kagamhanan sa dakbayan sa Naga ug University of San Carlos (USC) nag-umol og kasabutan kabahin sa Material Recovery Facility (MRF).

Si Dr. Danilo Largo, direktor sa research office sa USC mibutyag nga ang unod sa nahisgutang kasabutan mao ang pag-umol nila sa pagtuon kabahin sa solid waste sa Naga gamit ang bag-o nilang teknolohiya.

Matud ni Largo nga ilahang tun-an ang mga basura nga gipangkolekta sa FDR-Con Com Inc.

Ang FDR dunay kontrata tali sa dakbayan sa Naga diin sila maoy mokolekta sa mga basura sa siyudad ug dalhon nila diha sa ilang gitukod nga MRF sa barangay Pangdan, Naga.

Si Evelyn Taboada usa sa mga staff sa FDR mibutyag nga gikinahanglan nila ang abilidad sa research department sa USC alang sa saktong pamaagi sa paghimo sa basura ngadto sa bio-fuel.  

Nasayran nga mopadala ang USC og tulo ka tinun-an sa chemical engineering ngadto sa mga pasilidad sa FDR aron maoy mopahigayon sa usa ka tuig nga pagtuon.

Matud ni Padre Dionisio Miranda, SVD nga daku kaayo og matabang ang resulta sa maong pagtuon sanglit mahimo kining magamit sa katawhan.

Mitambong sa pinirmahay sa kasabutan si Naga City Mayor Valdemar Chiong ug mihulagway nga dakung matabang ang maong proyekto.

Kahinumduman nga ang nahisgutang MRF sa Naga nagsugod sa ilang operasyon sa miaging tuig ug nahimutang kini sa pito ka ektaryang luna diha sa Pangdan. (BANAT NEWS)