Anak ni Edigul way planong mag-Kongresista

CEBU, Philippines - Gihimakak ni Kongresista Eduardo Gullas sa unang distrito sa lalawigan sa Sugbo ang mga report nga ang iyang anak nga si Gerald Anthony “Didi” Gullas modagan isip Kongresista puli niya sa tuig 2013 nga eleksiyon.

“The family has not discussed that at all. We have not taken it up neither have I renewed my hangyo in 2001 when he begged off because Digul (Eduardo III) was still in grade 4 at that time”, ni Gullas pa.

Hinuon ang Kongresista kinsa naa na karon sa ikatulong termino niya sa Kongreso nagkanayon nga ang ilang mga leader gusto nga dunay usa ka Gullas nga modagan ngadto sa Kongreso.

Base sa report nga si Didi posibleng modagan kini isip Kongresista sa unang distrito sa lalawigan sa Sugbo sa umaabot nga eleksiyon sa 2013 human nga mitugot kining ibitay diha sa merkado publiko sa Tabunok ang iyang hulagway diha sa dakung tarpaulin.

Ang maong lugar nga gibitayan sa hulagway sa batan-ong Gullas makita kini sa tanang mopaingon ngadto sa habagatan.

Apan kung si Didi mobalibad kini ug palabihon ang iyang pribadong kinabuhi ang apo sa Kongresista nga si Samsam ang nagpakita og interest nga mosulod sa  politika.

Si Samsam, 26-anyos maguwang kini ni Eduardo Gullas III kinsa maoy first councilor karon sa dakbayan sa Talisay.

Sa laing bahin, daghang nagtuo nga ang Kongresista kinsa kanhi mayor sa dakbayan sa Talisay modagan pagbalik isip mayor sa siyudad ilabi na kataposang termino na karon ni Mayor Socrates Fernandez.

“It’s too early to tell, a politician never say never. But if I were to choose, I’d go back to UV”, matud sa Kongresista.

Si Gullas napili kining mayor sa Talisay niadtong tuig 2001 hangtud 2004.  (BANAT NEWS)