Lolo gidakdaka'g bato

CEBU, Philippines - Brutal nga kamatayon ang nahiaguman sa usa ka 71-anyos nga lalaki kinsa gituohang gitulis ug gipatay pinaagi sa pagdakdak kaniya og bato ug gituohang gilugit pa gyud ang iyang mga mata diha sa sulod sa sam-ang sa barangay Cogon sa lungsod sa Cordova kagahapon sa kaadlawon.

Ang biktima mao si Catalino Inoc, 71, residente sa barangay San Miguel lungsod sa Cordova.

Base sa pasiunang imbestigasyon ni Insp. Jonas Tajanlangit sa Cordova Police Station ang patay’ng lawas ni Inoc napalgan sa mga residente nga nabulit sa dugo ug gihulagway nga brutal kini nga gipatay.

Si Inoc nahiagum og samad agi sa pagdakdak sa gituohang bato sa iyang ulo, gilugit sa kawayan ang iyang mata ug baba sa gidudahang duha ka mga tawong kauban ra niini nga nakig-inom sa maong dapit.

Sayo pa niini, si Inoc gikatahong gikan sa bangko ug mikuha sa iyang benepisyo sa senior citizen ug nakig-inom sa duha ka mga tawo sulod sa maong sam-ang.

Nagduda ang kapolisan nga kaila ra sa biktima ang mga responsable sa maong krimen, nagduda usab silang posibleng adunay dakong kasuko sa biktima ang duha tungod sa pamaagi nila pagpatay niini.

Apan lakip sa gidudahan nila nga tulis ang motibo sa maong krimen gumikan kay nawagtang na ang pitaka niini nga adunay sulod P2 mil gikan sa benepisyo niini.

Ang duha ka mga tawong kainom sa biktima nailhan na sa kapolisan apan dihang ilang giadto sa ilang mga pinuy-anan wala na sila didto. (BANAT NEWS)