Mga bombero imbestigahon tungod sa gilungkab nga vault

CEBU, Philippines - Gipaubos sa imbestigasyon ang tanang sakop sa bomberong miresponde sa sunog sa miaging gabii diha sa dalan Leon Kilat siyudad sa Sugbu tungod sa gilungkab nga vault nga gisudlan sa kwarta sa usa sa mga nasunogan.

Si Chili Tita Cabatingan, tag-iya sa Wilcris Trading nga nahinabi sa mga tigbalita nagkanayon nga wala kaayo siya maapektuhi sa pagkasunog sa iyang tindahan apan iyang gikagul-an nganong giablihan ang vault nga gisudlan sa ilang kwarta.

Wala hinuon siyay gitumbok si kinsa ang milungkab sa vault apan matud niya walay laing nakasulod sa iyang tindahan atol sa sunog gawas ra gyud sa kabomberohan.

“Hangtud ko alas-2 sa kaadlawon miuli, unya pagkabuntag wala gyuy nakasulod nga tawo gawas sa bombero,” matud pa niini.

Nanawagan si Cabatingan nga ipaimbestigar ang maong pagpanglungkab nga mikuha sa kuwarta sa sulod niini.

Si Cebu City Fire Marshall Aderson Comar mipadayag nga iyang ipaubos sa imbestigasyon ang iyang mga sakop nga miresponde sa maong sunog aron pagwagtang sa pagduda.

Si SFO1 Virgilio Niñal nga nahinabi sa Banat News nagkanayon mikabat og P750 mil ang kinatibuk-ang danyos sa maong sunog nga gidudahang tungod sa electrical short circuit apan wa pa matino asa nagsugod.

Ang nasunog mao ang tulo ka tindahan nga Circuit Smart, Sugano Furniture ug Wilcris Trading nga nagsugod alas 10:44 ug nakontrolar sa 15 minutos human gipaubos sa general alarm.  (BANAT NEWS)