Wala magpa-retoke si Bella-igsuon

CEBU, Philippines - Gisalikway sa mga kabanay sa usa sa suspetsado sa pagdagit ug pagpatay ni Ellah Joy Pique nga si Bella Ruby Santos ang mga nanggawas nga report nga nagpa-retoke na kini sa iyang nawong aron makalingkawas gikan sa pagkasikop.

Si Marion Lalikan, 40, maguwang ni Santos kinsa nahinabi sa Banat News mihimakak nga nagparetoke na ang iyang manghod (Bella) ug mihulagway nga “hinanggaw” ang maong report nga mikatap.

Sumala pa sa mga nanggawas nga report nahalin na og P6 milyones ang maong balay, mismong si Bella sa usa ka report sa lokal nga tv station pipila ka adlaw na ang nakalabay miangkong niadto pang milabay’ng tuig niya gipanghagad nga ibaligya kini.

Sa mao gihapong report si Bella mipasiaw nga iyang gamiton ang kwarta sa paglingaw-lingaw samtang naa pa siya sa gawas ug midugang nga mahimo sad niyang gamiton ang salapi sa pagpa-retoke pinaagi sa pagpausab sa iyang ilong. Apan giklaro ni Lalikan nga wala pa mahalin ang maong balay apan nakahuwam kini og kwarta ug ang balay maoy gigarantiya. Sumala pa niya nga gi-post kini sa internet nga ibaligya.

Sumala pa niya nga buot ibaligya ni Bella ang balay aron wala nay mabiling handumanan tali ni Bella ug sa laing suspetsadong si Ian Charles Griffiths tungod kay nagkasabot si Bella ug bana niining atoa sa laing nasud nga magbalik.

Samtang gipakagamay lang ni Lalikan ang taho nga nagplanong maghikog si Bella tungod kay ‘palaban’ ang iyang igsuon ug makamaong moatubang sa pagsuway.

Nagtuo kining naghuwat lang si Bella sa resulta sa ilang gidusong petisyon ngadto sa Department of Justice (DOJ) sa pag-review sa kaso niini una pa kini mopatim-aw.

Si Kapitan Narciso Tablate, sa barangay Inayagan, dakbayan sa Naga sa pakighinabi niini sa Banat News nagkanayon nga kinahanglang mopatim-aw si Santos sa kasong giatubang.